முதலீடு பணத்திற்கு இரட்டிப்பு பணம் தருவதாக கூறி பல நூறு கோடி ரூபாய் மோசடி

முதலீடு பணத்திற்கு இரட்டிப்பு பணம் தருவதாக கூறி பல நூறு கோடி ரூபாய் மோசடி.. நிறுவன உரிமையாளரை கைது செய்ய வலியுறுத்தி சேலத்தில் இந்திய கம்யூனிஸ்ட் கட்சி மற்றும் பாதிக்கப்பட்டவர் நல சங்கம் ஆர்ப்பாட்டம்..

கடந்த 2015 மற்றும் 2016ம் ஆண்டுகளில் சிவக்குமார் என்பவர் சேலத்தை மையமாகக் கொண்டு இந்தியா சிபி டெவலப்பர்ஸ் என்ற நிறுவனத்தை தொடங்கினார். மேலும் அவரது நிறுவனத்தில் முதலீடு செய்தால் ஒரே வருடத்தில் பணத்தை இரட்டிப்பாக திருப்பி வழங்குவதாக கூறி ஏராளமானவர்களிடம் இருந்து பணத்தை பெற்றுள்ளார்.

அவ்வாறு அவர் சுமார் 3500 க்கும் மேற்பட்டவர்களிடம் வசூல் செய்த 500 கோடி ரூபாய் பணத்தை திரும்ப வழங்காமல் மோசடி செய்ததாக கூறப்படுகிறது. அதனால் கடந்த 2017 ஆம் ஆண்டு பாதிக்கப்பட்டவர்கள் அனைவரும் பொருளாதார குற்றப்பிரிவு காவல் துறையினரிடம் இது குறித்து புகார் தெரிவித்தனர்.

அதனை அடுத்து சிவக்குமார் மீது பொருளாதார குற்றப்பிரிவு காவல் துறையினர் வழக்கு பதிவு செய்தனர். பின்னர் அவர் கைது செய்யப்பட்டு சிறையில் அடைக்கப்பட்டார். தொடர்ந்து அவர் ஒரு ஆண்டுக்குள் பாதிக்கப்பட்டவர்களுக்கு பணத்தை திருப்பி கொடுத்து விடுவதாக கூறியதால் அவர் சில நாட்களிலேயே ஜாமீனில் வெளியே வந்தார்.

ஆனால் அவர் கூறியபடி பணத்தை நான்கு ஆண்டுகளுக்கு மேலாகியும் யாருக்கும் திருப்பித் தரவில்லை. அவர் இவ்வாறு ஏமாற்றி வருவதை கண்டித்து இன்று பாதிக்கப்பட்ட மக்கள் மற்றும் அவர்களுக்கு ஆதரவாக இந்திய கம்யூனிஸ்ட் கட்சியினர் இணைந்து இந்திய கம்யூனிஸ்ட் இணைந்து சேலம் மாவட்ட ஆட்சியர் அலுவலகம் அருகே மாபெரும் கண்டன ஆர்ப்பாட்டம் நடத்தினர்.

இந்திய கம்யூனிஸ்ட் கட்சியின் மாநில துணைச் செயலாளர் பெரியசாமி மற்றும் மூத்த வழக்கறிஞர் ப.பா. மோகன் ஆகியோர் தலைமையில் நடைபெற்ற ஆர்ப்பாட்டத்தில் ஏராளமானவர்கள் கலந்து கொண்டு பண மோசடியில் ஈடுபட்ட சிவகுமாரை உடனடியாக கைது செய்ய வேண்டும் என வலியுறுத்தி கோஷங்கள் எழுப்பினர்.

மேலும் மோசடி ஆசாமி சிவக்குமாருக்கு ஆதரவாக செயல்படும் பொருளாதார குற்றப்பிரிவு போலீசார் மீது நடவடிக்கை எடுக்க வேண்டும் என்றும் கூறிய மூத்த வழக்கறிஞர் ப.பா. மோகன் , கடந்த 2017 ஆம் ஆண்டு அப்போதைய முதல்வர் எடப்பாடி பழனிச்சாமி துணையோடு அதிமுகவை சேர்ந்த மோசடி ஆசாமி சிவகுமார் சில நாட்களிலேயே சிறையில் இருந்து வெளியே வந்தார்.

பின்னர் நாமக்கல்லில் நிதி நிறுவனம் தொடங்கி அங்கும் மோசடியில் ஈடுபட்டு வருகிறார். எனவே தமிழக அரசின் நிதி நிறுவன சட்டப்படி சிவகுமாரின் சொத்துக்களை பறிமுதல் செய்து பாதிக்கப்பட்டவர்களுக்கு திரும்ப வழங்க வேண்டும் என வலியுறுத்தி இந்த போராட்டம் நடைபெற்றதாக தெரிவித்தார்.

சேலம் ஆட்சியர் அலுவலகம் அருகே பணிரட்டிப்பு தருவதாக கூறி மோசடியில் ஈடுபட்ட சிவகுமாரை கைது செய்யக்கோரி ஏராளமானோர் திரண்டு வந்து ஆர்ப்பாட்டத்தில் ஈடுபட்டதால் பரபரப்பு ஏற்பட்டது.